Gipahigayon sa Cebu Provincial Government ang Women’s Empowerment Walk ug Exhibit isip kabahin sa selebrasyon sa National Women’s Month niadtong Marso 17 sa Capitol grounds sa Cebu Province.
Ang kalihokan gi-organisar sa Provincial Social Welfare and Development Office ug gisugdan pinaagi sa misa, gisundan sa mensahe gikan kang Gob. Pamela Baricuatro ug ribbon-cutting nga nag-abli sa exhibit alang sa publiko.
Sa iyang mensahe, gipasiugda ni Gob. Baricuatro ang kusog ug kalig-on sa kababayen-an, ilabi na sa ilang mga gihuptang problema nga kasagaran hilom lang nilang giatubang matag adlaw.
Matod niya, dili kinahanglan mahimong superhero ang usa ka babaye aron makahimo og kausaban. Ang pagpadayon bisan lisod, ang pagpaningkamot, ug ang pagsalig sa kaugalingon mao na ang tinuod nga kaisog.
Gipasabot usab sa gobernadora nga daghang responsibilidad ang gidala sa mga babaye sama sa pag-atiman sa pamilya, pagsuporta sa komunidad, ug pagpadagan sa negosyo, bisan pa man sa mga pagsulay ug kritisismo.
Ang exhibit ug bazaar sa Capitol nagpakita sa mga produkto ug istorya sa mga kababayen-an sa probinsya, nga nagsilbing ehemplo sa ilang paningkamot ug kalampusan. Dugang pa niya, ang pagpalig-on sa kababayen-an importante kay kung molambo sila, molig-on usab ang pamilya, komunidad ug ang tibuok probinsya.
Source: Cebu Province PIO
I via Renante Socia Lada