Sa liderato ni Police Colonel Abubakar Udang Mangelen Jr., padayon nga gipakusgan sa Cebu Police Provincial Office (CPPO) ang mga operasyon batok sa krimen aron mapreserbar ang kalinaw, kasigurohan, ug hustisya sa 44 ka lungsod ug 6 ka component city sa tibuok probinsya sa Sugbo.
Gikumpirmar sa CPPO nga 39 ka anti-illegal drugs operations ang ilang gihimo sulod sa Oktubre 6 hangtod 12, nga miresulta sa pagdakop sa 56 ka suspek ug pagkasakmit sa 72.50 gramos nga shabu nga nagkantidad og ₱493,000. Anaa usab ang 90 ka kaso nga gipasaka sa korte, timaan sa ilang lig-on nga kampanya batok sa iligal nga drogas.
Sa laing bahin, 46 ka operasyon ang gihimo aron masilbihan ang mga warrant of arrest, diin 41 ka wanted persons ang nadakpan. Sa kampanya batok sa iligal nga armas, 11 ka operasyon ang gipahigayon nga nagresulta sa 7 ka pagdakop ug 10 armas nga nakumpiskar, samtang 4 pa ka armas ang boluntaryong gisurender.
Gipangdakop usab sa kapulisan ang 12 ka tawo sa 7 anti-illegal gambling operations, ug nakakuha sila og ₱1,697 nga pusta, samtang 892 ka operasyon ang gihimo aron ipatuman ang mga local ordinances, nga nagtigom og ₱137,664 nga multa. Ang tanang kalampusan nagpakita sa padayon nga dedikasyon sa CPPO sa pagpanalipod sa mga Sugbuanon ug pagpabakod sa pagsalig sa komunidad.
Source: CPPO
I via Renante Socia Lada