Dako ang kalampusan sa Cebu Police Provincial Office (CPPO) human madakpan ang 565 ka suspek sa ilang tibuok bulan nga operasyon batok krimen gikan Setyembre 5 hangtod Oktubre 7, 2025. Ilang gipatuman ang operasyon ubos sa liderato ni PCOL Abubakar Udang Mangelen Jr., aron mapugngan ang iligal nga drogas, mga wanted person, pusil nga walay papeles, ug iligal nga sugal sa tibuok probinsya.
Sa ilang kampanya batok drogas, nakahimo ang kapulisan og 207 ka operasyon nga mitultol sa pagdakop sa 288 ka tawo. Narekober ang 875.34 gramos nga shabu nga nagkantidad og ₱5.9 milyon ug 200 ka marijuana stalks nga nagkantidad og ₱40,000. Sa operasyon batok sa mga wanted persons, 201 ka warrant of arrest ang gisilbi sa 164 ka operasyon ug nakadakop sila og 160 ka indibidwal, lakip na ang 21 ka Most Wanted Persons.
Padayon usab ang ilang kalihokan batok iligal nga armas, diin 56 ka operasyon ang gihimo, 42 ka suspek ang nadakpan, 49 armas ang nakumpiskar, ug 12 ka armas ang boluntaryong gisurender. Duha usab ka granada ang narecover ug 44 ka kaso ang gipasaka sa korte. Sa laing bahin, sa kampanya batok iligal nga sugal, 62 operasyon ang gihimo, 75 ka violators ang nadakpan, ug ₱15,521 nga pusta ang nakumpiskar.
Matod pa ni PCOL Mangelen, ang maong kalampusan nagpakita sa disiplina ug kaisog sa mga Cebuano pulis.
Kini nga kalihokan nagsuporta sa tinguha ni PBGEN Redrico A. Maranan, Regional Director sa PRO7, nga mapaabot ang “Makabagong Pulis sa Makabagong Panahon,” ug sa panawagan ni Governor Pamela S. Baricuatro nga dili tugotan ang bisan unsang klase sa krimen sa probinsya. Sa padayon nga paningkamot ug pagtinabangay, ang CPPO nagpadayon sa ilang misyon nga maghatag ug luwas ug malinawon nga Sugbo para sa tanan.
Source: CPPO
I via Renante Socia Lada