Gisuportahan ni Cebu Governor Pamela Baricuatro ang unang “Unlad Lokal Roadshow” sa Visayas nga nagtumong sa pagtabang sa mga online seller ug content creator nga mapalambo ang ilang negosyo pinaagi sa digital platforms.
Gipasiugdahan sa Department of Trade and Industry (DTI), uban sa TikTok ug Converge, ang programa aron tudloan ang mga gagmay ug medium nga negosyo sa paggamit sa online platforms aron mas daghan ang ilang maabot nga kustomer.
Gitudloan ang mga partisipante sa paggamit sa TikTok Shop ug Seller Center, paghimo og content, pag-livestream, paggamit sa affiliate networks ug digital advertising aron mas mapalambo ang ilang pagbaligya online.
Matud ni Governor Baricuatro, paspas nga nag-usab ang pamaagi sa pagnegosyo ug dako ang oportunidad sa mga negosyante kung magamit nila pag-ayo ang online platforms aron makaabot sa mga kustomer bisan gawas sa ilang lugar.
Gipahinumdoman usab sa DTI ang mga online seller nga kinahanglan mosunod sa mga kinahanglanon sa gobyerno ug magparehistro sa hustong paagi. Matud sa ahensya, makatabang kini sa pagpanalipod sa mga konsumante ug pagpalig-on sa pagsalig sa mga negosyo.
📸 Cebu Province PIO
I via Renante Socia Lada