Mokabat sa 672 ka tawo ang nasikop sa Cebu Police Provincial Office (CPPO) atol sa gipakusgang operasyon batok sa mga paglapas sa lokal nga ordinansa kagahapon Agosto 25, 2026.
Sa 303 ka operasyon, 456 ang gipamulta samtang 216 ang gipasidan-an o gipagawas. Mikabat sa ₱318,440 ang total nga nakolekta nga multa.
Kadaghanan sa mga paglapas may kalabotan sa traffic ordinances. Lakip usab ang pag-inom ug pagpanigarilyo sa pampublikong lugar, paglaag nga walay sapot sa ibabaw, paglapas sa curfew sa mga menor de edad, ug paggamit sa karaoke lapas sa gitakdang oras.
Sa mga siyudad, pinakadaghan ang nasikop sa Toledo City nga miabot sa 86, gisundan sa Carcar City nga anaa sa 73 ug sa Bogo City nga mikabat sa 47. Sa mga lungsod, Asturias ang pinakadaghan og 41 ka nasikop.
Matud sa CPPO, ang operasyon nagtumong sa pagpalig-on sa disiplina, pagpugong sa krimen ug pagmintinar sa kalinaw ug kahapsay sa mga komunidad sa tibuok Cebu.
📸 CPPO
I via Renante Socia Lada