Gipasidunggan sa Kagamhanan sa Dakbayan sa Sugbo ang Cebu City Police Office (CCPO) ubos sa liderato ni PCOL Enrico Evangelista Figueroa tungod sa ilang hiniusang paningkamot sa pagmintinar sa kalinaw ug kahapsay atol sa Semana Santa ug sa National ug Local Elections 2025.
Pinaagi sa Resolution No. 16-3601-2025, gihatagan ug pasidungog sa Sangguniang Panlungsod ang CCPO ug uban pang partner agencies sama sa Police Regional Office 7, COMELEC Region 7, Coast Guard District Central Visayas, ug uban pang law enforcement ug disaster response units. Gilauman sa resolusyon ang ilang pasidungog nga pagserbisyo nga nakatabang sa hapsay ug malinawon nga pag-obserbar sa Semana Santa ug sa luwas nga pagpadagan sa eleksyon sa dakbayan.
Gipasiugda sa resolusyon nga ang pagmintinar sa kalinaw ug kahapsay, pagpanalipod sa kinabuhi, kagawasan ug kabtangan, ug ang pagpalambo sa kaayuhan sa katawhan na maoy yawi aron makatagamtam ang mga lungsuranon sa tinuod nga demokrasya.
Atol sa Semana Santa, nakig-alayon ang CCPO sa lain-laing ahensya sa seguridad ug emergency response aron masiguro ang proteksyon sa katawhan. Kapin sa 2,100 ka mga kapulisan ang gideploy sa rehiyon ubos sa mando ni PBGEN Redrico A. Maranan, Regional Director sa PRO-7. Giklaro usab sa COMELEC-7 nga wala’y natalang paglapas sa electioneering ban niadtong Huwebes Santo ug Biyernes Santo.
Ang maayong koordinasyon sa mga ahensya kalakip ang traffic management, disaster risk reduction efforts, ug presence of security forces, mao’y nakaamot sa walay dakong insidente nga nahitabo niadtong maong mga okasyon.
Padayon ang paningkamot sa CCPO sa pagserbisyo nga may integridad alang sa kalinaw ug seguridad sa dakbayan, uban sa walay puas nga pakigtambayayong sa uban pang mga ahensya.
Source: CCPO
I via Renante Socia Lada