Segon sa Cebu City PIO nga gimandoan ni Cebu City Mayor Raymond Alvin Garcia ang kapulisan nga mas pahugtan pa ang pagpatuman sa police visibility dinhi sa dakbayan sa Sugbo karon nga naghinangat na ang Pasko.
Gisulti kini niya atol sa command conference nga gipahigayon kagahapong adlawa, Nobiyembre 19, 2024, sa Cebu City Police Office (CCPO) headquarters.
“Kahibaw bitaw mo nga karong December is a festive season…daghan kaayo og tawo on the streets, in the malls, in public places, and all the more our visibility as a police force should be enhanced and should be augmented. And I expect no less from the Philippine National Police…for its visibility karong umaabot nga Christmas season,” pamahayag ni Mayor Garcia.
“Mao na nga nagpatawag dayon ko og command conference because again we will be expecting people to go to public places like churches kay magsugod na ang simbang gabi. Of course, mongadto sad sila og mga terminals…. And third are the malls, public places,” dugang niya.
Matud ni Mayor Garcia, iya lang gisiguro nga ang CCPO adunay deployment plan kung pila ka mga pulis ang ipakatap sa mga lugar nga tapokanan sa mga tawo. Gusto sab niya nga ipadoble ang gidaghanon sa mga pulis nga nagpatuman sa police visibility sa lukop sa dakbayan.
Gawas sa Pasko, usa sab sa gimando ni Mayor Garcia nga pangandaman gyud sa kapulisan mao ang pagsaulog sa Sinulog sunod tuig, nga gilantaw nang daan ang pagdagsa sa mga bisita, lakip na ang gikan sa lainlaing mga nasud, ilabi na kay ibalik na kini sa Cebu City Sports Center isip venue.
“We are expecting an influx of visitors coming from the different parts of the world. So, mao na, I wanted a stricter, better-planned Sinulog, more peaceful…para ang atong celebration sa Sinulog will be…very memorable for all of us,” pulong sa mayor.
Gisulti niya nga gawas sa CCSC grandstand nga kaya ang 10,000 ngadto sa 12,000 ka mga tawo, butangan sab og mga bleachers ang rota sa Sinulog 2025.
Kabahin niini, naghinaot si Mayor Garcia nga adunay klaro nga action plan ang kapulisan sa nahisgotan nga mga kalihokan.
I via Renante Socia Lada