El mga autoridad ya aresta siete personas y ya confisca P102,000 valor de droga ilegal cuando ya desmantela sila un cuarto de droga na un operacion contra droga na Lanao del Sur, asegun con el Philippine Drug Enforcement Agency (PDEA) del Miercoles.
Si Gil Cesario Castro, el director del PDEA na Bangsamoro Autonomous Region in Muslim Mindanao (BARMM), ya identifica con el mga arestao suspechao como canda as Masigay Tumbaji Daut, 52 años el edad, un moher, y el mantenedor de cuarto de droga; Disinon Moda Mabagur, 45; Aliton Tumbaji Baut, 21; Era Daut Orab; Montasir Tumbaji Daut; Maulana Mago Abad; y, Dioselito Ayson Capucao.
Asegun con Castro, con el mga suspechao ya aresta na un operacion de compra busto que ya resulta na desmantelada del cuarto de droga del Lunes na Purok 2, Barangay Panang, Wao, Lanao del Sur.
Asegun con Castro, ya confisca na desmantelao cuarto de droga 15 gramos de suspechao shabu enpaquetao na 15 termosellada transparente plastico sobrecitos que tiene el valor de P102,000, un transparente plastico sobrecito de seco hojas de mariujana, tres paso de siembra de marijuana, dinero de compra busto, y varias parafernales de droga.
Si Castro ya habla, con el mga suspechao ya detene na carcel del PDEA en preparacion para el plantada del asunto contra canila por violacion del ley Integral de Drogas Peligrosas de 2002.
Asegun con Castro, el operacion de compra busto ya conduci el mga agentes de PDEA con el suporta del policia na municipio del Wao y 55th Infantry Battalion. (B. Garcia)