Gipasalamatan ni Mayor Raymond Alvin Garcia ang kontribusyon sa business process outsourcing (BPO) industry alang sa padayon nga pagpalambo sa ekonomiya sa Sugbo, ilabi na sa paghimo og trabaho ug pagpalig-on sa lokal nga negosyo.
Sa iyang pamulong atol sa “WiPro Philippines Inc. Cebu Site Inauguration” niadtong Nobyembre 20, 2024, sa Ayala Central Bloc, Cebu IT Park, gipadayag niya ang iyang pasalamat sa sektor, nga giila nga kaabag sa kalamboan sa dakbayan.
Matod ni Mayor Garcia, usa kini ka buhing tinuod sa tambag sa iyang amahan, si kanhi mayor Alvin Garcia, nga ang turismo ug BPO mao ang mga sektor nga makapausbaw pag-ayo sa ekonomiya. Gipasabot niya nga ang BPO dili lamang naghatag og trabaho kundi nagapadayon usab og daghan nga oportunidad alang sa Sugboanon ug mga negosyo.
Kung adunay trabaho ang tawo, aduna sab siyay ikagasto, ug mabuhi ang mga negosyo. Kini nga siklo nagpalig-on sa ekonomiya, dugang ni Mayor Garcia.
Gipahibalo usab niya ang importansya sa mga proyekto ubos sa Public-Private Partnership (PPP), sama sa Nustar Resort and Casino ug Cebu-Cordova Link Expressway (CCLEX). Kini mga ehemplo sa mga kalampusan nga walay gasto sa lokal nga kagamhanan apan nagdala og dako nga kita ug benepisyo sa siyudad.
Nagpabilin nga sentro sa paglambo ang Dakbayan sa Sugbo, nga pinaagi sa suporta sa sektor sa BPO, padayon nga nagapakita sa potensyal alang sa mas malungtarong kalambuan.
Source: Cebu City PIO
I via Renante Socia Lada