Aron mapalig-on ang panaghiusa ug kalambuan sa sektor sa hustisya sa Cebu City, nagkigtapok karong Agosto 4, 2025 ang mga opisyal ug representante sa Cebu City Justice Zone (CCJZ) kang Mayor Nestor Archival sa iyang buhatan.
Gipangulohan ang pagbisita ni Executive Judge Anacleto Debalucos, Convenor sa CCJZ, uban sa mga representante gikan sa Regional Trial Court (RTC), Office of the City Prosecutor, DILG-Cebu City, Public Attorney’s Office (PAO), Parole and Probation Administration, Cebu City Police Office (CCPO), BJMP, Operation Second Chance, ug Integrated Bar of the Philippines (IBP).
Gihisgutan sa ilang panagtagbo ang daghang isyu, lakip na ang proposed ordinance nga nagtinguha nga pormal nga itukod ang Cebu City Justice Zone aron mas mapaayo ang pakigkoordinasyon ug panagtambayayong sa mga ahensya sa hustisya ug uban pang institusyon sa siyudad.
Usab, ilang gisugutan ang pagtukod og Bahay Pag-asa para sa mga kabatan-onang nalambigit sa krimen (Children in Conflict with the Law o CICL), ubos sa Republic Act No. 9344 (Juvenile Justice and Welfare Act).
Gidawat ni Mayor Archival ang mga isyu nga ilang gihatag ug misaad nga makigtambayayong ang City Government sa Cebu City Justice Zone aron masiguro nga ang katawhan makadawat og husto, patas, ug klaro nga hustisya.
Source: Cebu City PIO
I via Renante Socia Lada