Cebu City – Liboan ka mga Sugboanon ang mitambong sa Ceboom Grand Rally sa North Reclamation Area (NRA), syudad sa Mandaue, Hwebes, Abril 21, 2022, pagsuporta ni presidential candidate Lenie Robrero ug vice presidential candidate Francis “Kiko” Pangilinan.
Pagka alas 7:30, gibana bana sa local police nga miabot ug 50,000 ang gidaghanon sa mitambong sa rally.
Pipila ka oras ang milabay, matod ni Lt. Col. Franco Rudolf Oriol, tigpamaba sa Mandaue City Police wala na kini mohatag ug updates sa crowd estimates ug iya na lang kining gitugyan ngadto sa mga nag organize sa rally.
Ang organizer sa maong event mibana bana nga miabot ug 250,000 ang misalmot pagka alas 9 sa gabii, dihang misugod na ug estorya si Robredo.
“The area (of the rally) is 52,659 sq meters multiply by four or five per person in a square meter,” matod ni Ricky Ballesteros, usa sa mga organizers sa event, sa iyang Facebook page.
Sa iyang bahin, usa ka local police official nga dili magpahingan, mibana bana sa gidaghanon nga miabot ug 150,000 sa katapusang bahin sa event.
Matod ni Oriol nga bisan ug gihugupan ug daghang mga tawo ang maong kalihukan gihulagway kini nga generally peaceful and orderly.
Giangkon ni Oriol nga dunay pipila nga mitambong sa rally nga “young adults” ang nadala sa medics sud ug gawas sa venue gumikan sa reklamo nga pagka lipong, dehydration ug high blood pressure.
Pipila ka oras sa wala pa ang rally, mitambong sila si Robredo ug Pangilinan sa mga mini rallies sa mga lungsod sa Bantayan, Tabuelan, Tuburan ug syudad sa Bogo ug Danao sugod sa alas 8 sa buntag, aron pagpakigtagbo sa ilang mga supporters.
Miuban sa ilang mga lakaw si reelectionist Vice Governor Hilario “JunJun” Davide III, lakip na sa pagpakigtagbo sa mga kadagkuan sa Bakud Party sa Fifth District atol sa pagbisita niini sa Danao sa samang adlaw. (Jhon Tadlip)
(News & photo courtesy of Mandaue City Police Office | Ricky Ballestero Facebook page)