Upat ka suspetsado sa iligal nga drogas ang nadakpan samtang ₱5,100 nga balor sa shabu ang nasakmit atol sa usa ka semana nga operasyon sa Cebu City Police Office (CCPO) ilalom sa Oplan Bulabog ug Oplan Bakal-Sita gikan Agosto 18 hangtod 24, 2025.
Ang operasyon gipangulohan ni CCPO Acting City Director PCOL Enrico Evangelista Figueroa uban sa suporta sa PRO-7 Regional Director PBGEN Redrico A. Maranan ug naglakip sa tanang police stations ug specialized units sa dakbayan.
Nasikop ang upat ka lalaki sa Barangay T. Padilla ug Barangay Tejero, diin nakumpiskar ang 0.75 gramos nga gituohang shabu. Ang mga suspetsado giatubang na sa kaso ubos sa Section 11, Article 2 sa RA 9165 o Comprehensive Dangerous Drugs Act of 2002.
Gawas sa anti-drug operations, gisusi usab ang 2,204 ka establisimyento ug 559 ka menor de edad ang nasalbar human masapnan nga nakalapas sa curfew. Napulo ug tulog (35) ka citation tickets ang gi-isyu alang sa naglapas sa ordinansa sama sa pagpanigarilyo ug pag-ihi sa pampublikong lugar.
Matod ni PBGEN Maranan, dako og papel ang klaro ug kusog nga police presence ilabi na sa mga dapit nga taas ang krimen aron mapadayon ang kalinaw ug kasigurohan. Giawhag usab niya ang padayon nga pakig-uban sa LGU ug uban pang partners alang sa mas epektibong crime prevention strategies.
Ang malampusong operasyon nagpakita sa tinguha sa kapulisan nga mapalig-on ang kalinaw ug seguridad sa Cebu City, ug mapadayon ang paningkamot aron mahimong drug-free ang komunidad.
Source: CCPO