Nadakpan sa kapulisan ang 12 ka mga tawo lakip ang usa ka armado ug 11 ka drug suspects atol sa gipahigayon nga Oplan Bulabog ug Oplan Bakal-Sita sa Cebu City Police Office (CCPO) gikan Setyembre 2 hangtod 7, 2025.
Sa operasyon, nakumpiskar sa kapulisan ang gibanabana nga 6.65 gramos nga gituohang shabu nga nagkantidad og ₱45,220. Ang mga nadakpan karon nag-atubang og kaso ubos sa Comprehensive Dangerous Drugs Act of 2002. Usa usab ka suspetsado ang nasikop tungod sa iligal nga armas.
Gawas sa kaso sa drogas ug armas, gibisita ug gi-inspeksyon sa kapulisan ang 1,812 ka establisemento sa dakbayan. Nakuha nila ang 460 ka menor de edad nga nakalapas sa curfew regulation. Ang ilang kaluwasan ug proteksyon maoy giuna sa kapulisan.
Dugang pa, 47 ka citation tickets ang gi-issue sa mga nakalapas sa ordinansa sama sa pagpanigarilyo ug pag-ihi sa daplin sa dalan. Kini usa ka lakang aron mapadayon ang kahapsay ug disiplina sa komunidad.
Matod pa ni PCOL Enrico Evangelista Figueroa, Acting City Director sa CCPO, ug PBGEN Redrico A. Maranan, Regional Director sa PRO-7, ang padayon nga presensya sa kapulisan ug pakigtambayayong sa lokal nga gobyerno ug stakeholders importante aron mapalig-on ang kalinaw ug seguridad sa Cebu City.
Source: CCPO
I via Renante Socia Lada