Nakasikop og 11 ka suspetsado nga nalambigit sa iligal nga drogas ang Cebu City Police Office (CCPO) samtang 638 ka menor de edad ang ilang naluwas atol sa sunod-sunod nga operasyon gikan Pebrero 2 hangtod 8, 2026. Kini nga mga lakang kabahin sa hugot nga kampanya sa kapulisan aron mapadayon ang kalinaw ug kahapsay sa dakbayan.
Sa anti-illegal drugs nga operasyon, nasakmit sa CCPO ang kapin 13.11 gramos sa gituohang shabu nga nagkantidad og ₱89,148. Ang tanang nadakpan pasakaan og kaso tungod sa paglapas sa Section 11, Article II sa Republic Act 9165 o Comprehensive Dangerous Drugs Act of 2002.
Samtang, ang 638 ka menor de edad nasakpan tungod sa paglapas sa curfew ug daling giturn-over sa tagsa-tagsa nila nga barangay GAD ug social welfare offices alang sa hustong pag-atiman ug interbensyon.
Kini nga mga kalampusan nakab-ot ubos sa OPLAN BULABOG ug OPLAN BAKAL-SITA, ubos sa liderato ni CCPO Officer-in-Charge PCOL George V. Ylanan, inubanan sa koordinasyon sa PRO-7 nga gipangulohan ni Regional Director PBGEN Redrico A. Maranan.
Dugang pa, nakahimo ang CCPO og 2,073 ka inspeksyon sa mga establisyemento aron masiguro ang pagsunod sa mga balaod ug ordinansa. Samtang ang CESET nakapagawas og 21 ka citation tickets alang sa gagmay’ng paglapas sama sa pagpanigarilyo ug pag-inom sa publikong lugar ug pag-ihi sa dalan.
Gidayeg ni PBGEN Maranan ang panaghiusa sa kapulisan, LGUs, ug partner agencies, ug iyang gipasiugda ang kamahinungdanon sa aktibong pagpatuman sa balaod aron malikayan ang krimen.
Samtang si PCOL Ylanan nagpamatuod sa padayon nga paningkamot sa CCPO nga mapadayon ang usa ka malinawon, luwas, ug drug-cleared nga Cebu City, ug nanawagan sa kooperasyon sa katawhan alang sa kalinaw ug kahusay sa syudad.
Source: CCPO
I via Renante Socia Lada