Nagpakita og panaghiusa ang Cebu City human ipadala ang disaster response team niini sa Iligan City aron motabang sa mga naapektuhan sa Bagyong Basyang. Pinaagi sa Cebu City Disaster Risk Reduction and Management Office (CCDRRMO), aktibong miapil ang siyudad sa clearing ug recovery operations isip kabahin sa Task Force Iligan.
Sa ikaduhang adlaw sa ilang deployment niadtong Pebrero 9, 2026, gipunting sa CCDRRMO team ang Barangay Mahayahay, dapit sa Shell Gas Station, nga usa sa mga lugar nga grabeng naigo sa bagyo. Ang maong lugar napuno sa debris, natumba nga kahoy ug yuta nga nakababag sa mga dalan ug agianan sa komunidad.
Nagpokus ang clearing operations sa pag-abli pag-usab sa mga dalan aron masiguro ang luwas nga paglihok sa mga residente, responders ug motorista. Importante usab kini aron mapadali ang paghatod sa relief goods ug serbisyo sa mga apektadong pamilya.
Ang kalihokan gihimo ubos sa koordinasyon sa Iligan City Disaster Risk Reduction and Management Office aron masiguro nga organisado ug episyente ang tanang lakang sa pagtubag sa sitwasyon. Pinaagi sa maayong koordinasyon, napadali ang trabaho ug nalikayan ang kalibog sa operasyon sa field.
Samtang nagpadayon ang recovery efforts, nagpabilin nga andam ang Cebu City disaster responders alang sa dugang nga buluhaton kon gikinahanglan. Ang ilang presensya sa Iligan City nagpakita nga sa panahon sa kalamidad, nagtinabangay ang mga siyudad aron suportahan ang pagbangon ug pagpalig-on pag-usab sa mga komunidad nga naapektuhan.
Source: Cebu City PIO
I via Renante Socia Lada