Nagsugod na ang sayong pagpangandam sa Cebu City Police Office (CCPO) alang sa Sinulog 2027 human mitambong ang mga opisyal niini sa unang coordination meeting alang sa umaabot nga selebrasyon.
Mitambong sa tigum sila si PCOL Ricky C. Sumalde, Acting City Director sa CCPO, ug PLTCOL Franco Rudolf Z. Oriol, Deputy City Director for Administration. Gipahigayon ang tigum sa Mayor’s Conference Room sa Cebu City Hall ug gipangulohan ni Cebu City Councilor Pablo Labra uban si Jojo Elmer Labella, Executive Director sa Sinulog Foundation Inc. o SFI.
Apil usab sa tigum ang mga representante gikan sa Armed Forces of the Philippines o AFP Visayas Command, Philippine Coast Guard, BJMP, Cebu City Transportation Office, Bureau of Fire Protection, Department of Social Welfare Services, PROBE Team ug uban pang partner agencies.
Gihisgutan sa mga opisyal ang mga leksyon ug kasinatian sa Sinulog 2026 nga mahimong gamiton sa paghimo sa security plan alang sa 2027. Lakip niini ang kalendaryo sa mga kalihokan, deployment sa mga personnel, traffic ug crowd management, emergency response, ug koordinasyon sa nagkalain-laing ahensya.
Tumong sa sayong koordinasyon nga mahibal-an daan ang posibleng kakulang sa operasyon ug klarohon ang responsibilidad sa matag ahensya aron mas han-ay ang pagdumala sa daghang deboto, residente, bisita ug turista nga motambong sa Sinulog.
Gipasalig sa CCPO ang padayong koordinasyon uban sa Cebu City Government, SFI ug uban pang partner agencies aron masiguro ang luwas, malinawon ug hapsay nga pagsaulog sa Sinulog 2027.
I via Renante Socia Lada