Himuon sa Cebu Provincial Government ang Carcar City nga host sa kataposang leg sa Medical and Surgical Caravan of Services isip kabahin sa selebrasyon sa ika-457 nga Founding Anniversary sa probinsya sa Cebu.
Ipahigayon ang kalihokan sa Septiyembre 26 ug 27, 2026. Ang mga pasyente nga kwalipikado ug na-screen na daan makadawat og libre nga operasyon alang sa hernia, gallstones, goiter ug hemorrhoids sa Cebu Provincial Hospital-Carcar City.
Adunay libre nga medical consultation sa Carcar City Sports Complex sa Septiyembre 26, diin magsugod ang registration alas 6:30 sa buntag. Makakonsulta ang mga pasyente sa mga espesyalista sa pulmonology, nephrology, cardiology, endocrinology, pediatrics ug dermatology. Apil usab ang general consultation alang sa kasagarang sakit sama sa ubo, sip-on ug hilanat.
Libre usab ang pagpapiso sa ngipon, eye check-up ug reading glasses, ug HIV screening. Alang sa dental extraction, first-come, first-served ang pagdawat ug kutob lamang sa 200 ka pasyente.
Gipahigayon ang medical caravan pinaagi sa pakigtambayayong sa Carcar City Government, University of Cebu Medical Center, Cebu Medical Society, Cebu Dental Society, Cebu Optometric Society, VSMMC Kaambag Clinic, Malasakit at Bayanihan Party-list, Integrated Bar of the Philippines, Cebu Provincial Hospital-Carcar City ug Cebu Provincial Health Office.
I via Renante Socia Lada