Nagpahigayon og usa ka makasaysayanong kalihokan ang Cebu City Police Office (CCPO) uban sa mga Muslim leaders sa Hinirang Hall, Barangay Apas, Cebu City karong Setyembre 10, 2025. Gipangulohan kini ni PCOL Enrico Evangelista Figueroa, Acting City Director sa CCPO, aron palig-onon ang relasyon ug kooperasyon tali sa kapulisan ug sa komunidad sa Muslim.
Lakip sa gihimo sa maong kalihokan mao ang eleksyon ug panumpa sa mga bag-ong opisyales sa Salaam Police Advocacy Group (SPAG). Usa sa mga espesyal nga bisita ug mamumulong mao si PBGEN Jonas “Khalid” Munta Ejoc, Ph.D (Ret.), National SPAG President sa Region 7 ug Vice President para sa Visayas. Sa iyang mensahe, iyang gipasabot ang dakong papel sa SPAG isip kauban sa kapulisan sa pagpalig-on sa kalinaw ug seguridad sa siyudad.
Daghan usab nga mga Muslim leaders ang mitambong ug nagpakita sa ilang tibuok-suporta nga alang sa mga programa sa Philippine National Police (PNP) ug sa Cebu City Police Office. Kini nagpakita sa ilang tinud-anay nga pakig-uban aron mapadayon ang kalinaw, kahapsay, ug panaghiusa sa siyudad.
Sa iyang mensahe, si PCOL Figueroa nagpasalamat sa aktibong suporta sa komunidad ug iyang giila nga ang mga lig-on nga alyansa sama niini mao’y tinubdan sa epektibong pagpang-gobyerno ug seguridad para sa tanan.
Ang maong kalihokan nagtimaan sa usa ka bag-ong panaghiusa tali sa kapulisan ug sa Muslim community, nga nagpadayag nga pinaagi sa kooperasyon ug pagsinabtanay, masiguro ang kalinaw ug kaayohan sa dakbayan sa Sugbo.
Source: CCPO
I via Renante Socia Lada