Nagmalampuson ang live simulation exercise nga gihimo sa Cebu City Police Office (CCPO) ubos sa pagdumala ni Acting City Director PCOL Enrico E. Figueroa. Gituyo kini aron masulayan ang abilidad sa kapulisan nga motubag sulod lang sa lima ka minuto sa usa ka emerhensiya.
Ang ensayo, nga gipasalida live sa Facebook, gimugna uban sa tabang sa media personalities sa syudad, ug gipahigayon sa J. Panis Street, Banilad, diin gibuhat ang usa ka peke nga senaryo sa armado nga hulga.
Gidumala kini ni PLTCOL Miguel B. Andeza, Chief sa City Operations Management Unit (COMU), ang kalihokan. Apil sa mitambong ang Mabolo Police Station 4, Mobile Patrol Unit, ug City Mobile Force Company. Nakasulod ang unang mga pulis sa lugar sulod lang sa tulo ka minuto, nagsugod ang alerto alas 10:49 sa buntag ug miabot ang kapulisan alas 10:52.
Gipasabot sa CCPO nga ang maong kalit nga simulation makatabang sa pagpalig-on sa ilang operasyon, pagsalig sa komunidad, ug kalinaw. Gipasigarbo usab niini ang dedikasyon sa CCPO sa padayon nga pagbansay ug matinud-anong serbisyo.
Gipahimangnoan usab ang publiko nga magmatinud-anon sa pag-report sa mga insidente. Ang mga bakak nga reklamo silotan ubos sa balaod.
Nagpakita kini nga andam ug responsableng molihok ang CCPO alang sa kasigurohan sa katawhan ug sa tinguha nga usa ka mas luwas nga “Bagong Pilipinas.”
Source: CCPO
I via Renante Socia Lada