Gawasnon na ang 63 ka Persons Deprived of Liberty (PDLs) gikan sa Mandaue City Jail Male Dormitory atol sa pagsaulog sa Adlaw sa Kagawasan, Hunyo 12, 2025. Ang kalihokan usa ka simbolo sa ikaduhang kahigayunan ug paglaum alang sa mga piniriso nga naningkamot nga magbag-o.
Pinangulohan ni Jail Superintendent John Conrad Marcilino Basilio, gipagawas ang mga PDL pinaagi sa Good Conduct Time Allowance (GCTA) program. Kini nga programa nagtugot sa pagpaubos sa silot sa mga piniriso nga nagpakita og maayong pamatasan ug disiplina sulod sa bilanggoan.
Ang GCTA usa ka lakang sa gobyerno aron hatagan og ikaduhang kahigayunan ang mga piniriso nga naningkamot nga magbag-o ug mamahimong produktibong miyembro sa katilingban pagbalik sa kagawasan. Giduyugan sa kalipay ang mga pamilya sa mga PDL nga naghulat kanila sa gawas sa bilanggoan.
Ang maong kalihokan gihimo diha sa sulod sa Mandaue City Jail ug gisaksihan sa mga opisyal sa Bureau of Jail Management and Penology (BJMP) ug uban pang mga ahensya nga misuporta sa kalambuan ug rehabilitasyon sa mga piniriso.
I via Renante Socia Lada