Nagpahigayon og seminar ang Cebu City Police Office (CCPO) ilawom sa pagdumala ni Acting City Director PCOL Enrico Evangelista Figueroa aron masulbad ug mapugngan ang mga pagpangawat ug pagpanulis batok sa mga jewelry store ug pawnshop sa dakbayan.
Gidala kini sa City Intelligence Unit (CIU) karong Setyembre 23, 2025, ug gitambongan sa mga managers gikan sa lain-laing pawnshop, jewelry store, ug financial institutions sa Cebu City. Gidiskasan niini ang mga modus operandi sa mga kriminal ug giinstruhunan ang mga negosyante unsaon pagsangga ug unsaon ang paspas nga pag-report sa mga insidente.
Usa sa gi-highlight sa seminar mao ang pagpalig-on sa seguridad, sama sa pagbutang og CCTV cameras, alarm system, ug training sa security guards aron maprotektahan ang ilang negosyo ug kustomer.
Nagpasalamat ang mga negosyante sa inisyatiba sa kapulisan ug misuporta sa kampanya sa CCPO batok krimen. Giila nila ang kalihokan isip usa ka dakong tabang aron mapadayon ang kalinaw ug seguridad sa syudad.
Si PCOL Figueroa misulti nga padayon ang ilang paningkamot aron masiguro ang kaluwasan sa katawhan ug mopadayon sila sa pagpalig-on sa police visibility ug surveillance.
Gi-awhag usab sa CCPO ang publiko ug business sector nga mo-report dayon kung adunay makitang kadudahang kalihokan aron malikayan ang krimen.
Source: CCPO
I via Renante Socia Lada