Gipaabot sa Cebu City Police Office (CCPO) ang dakong pagkunhod sa kriminalidad sa syudad human matala ang 57.69% nga pagkunhod sa total nga krimen gikan Abril 23 hangtod Mayo 22 karong tuiga kung itandi sa samang panahon niadtong 2024.
Sumala sa report sa CCPO, gikan sa 78 ka kaso sa 2024, nahulog ngadto sa 45 ka kaso karong 2025 ang mga gitutukan nga krimen nga naglakip sa murder, homicide, rape, physical injury, robbery, theft, ug carnapping.
Gawas sa pagkunhod sa krimen, misaka usab ang crime solution efficiency rate sa 87.88%, kung itandi sa 73.75% niadtong miaging tuig. Ang kalampusan gipasukad sa mas gipakusgang imbestigasyon nga gihimo sa Criminal Investigation and Detection Unit (CIDU), nga maoy responsable sa daghang napasakang kaso.
Sa laing bahin, nakita usab ang padayon nga pagkunhod sa mga kaso sa pagpamusil sa syudad. Base sa datos, adunay 12 ka shooting incidents sa Enero 2025, apan kini mikunhod sa 8 sa Pebrero ug Marso, 4 sa Abril, ug zero case sa Mayo 22.
Ang kapulisan nagtuo nga resulta kini sa mga gipatuman nga lakang sama sa night patrols, Oplan Bulabog operations, ug ang “Isumbong Mo Kay CD” hotline, nga nagtugot sa publiko sa dali nga pag-report sa mga suspetsadong kalihukan.
Matod ni PCOL Enrico E. Figueroa, Acting City Director sa CCPO nga dili lang kini kalampusan sa kapulisan, apan usa kini ka paningkamot nga gisalmutan sa katawhan.
Gipasidunggan usab niya ang tanang police stations ug ang suporta sa mga residente sa ilang pagpangandam batok sa krimen.
Ang CCPO nagpabiling lig-on sa ilang kampanya batok sa kriminalidad ubos sa giya sa PBGEN Redrico A. Maranan, Regional Director sa Police Regional Office 7 (PRO-7), subay sa mga programa sa Bagong Pilipinas alang sa kalinaw ug seguridad sa lokal nga komunidad.
Source: CCPO
I via Renante Socia Lada