Gipadayon sa Police Regional Office 7 (PRO7) ang ilang hugot ug agresibong kampanya batok sa tanang matang sa kriminalidad sa Central Visayas gikan Abril 5 hangtod 11, 2026.
Sa kampanya batok sa ilegal nga drogas, nakahimo ang PRO7 og 145 ka operasyon nga miresulta sa pagdakop sa 159 ka mga suspek. Nakasakmit usab ang kapulisan og kapin 2 kilos nga shabu nga nagkantidad og mga ₱15.3 milyon, apil ang 32.70 gramos nga marijuana.
Sumala ni PBGEN Redrico A. Maranan, Regional Director sa PRO7, nagpabilin ang ilang lig-on nga kampanya aron mapugngan ang ilegal nga drogas ug uban pang krimen sa rehiyon.
Gipadayag usab niya nga magpadayon ang ilang operasyon aron mas masiguro ang kaluwasan sa mga komunidad sa Central Visayas.
Sa kampanya batok sa mga wanted persons, 79 ka tawo ang nadakpan, lakip ang 7 ka Most Wanted Persons.
Sa operasyon batok sa mga ilegal nga armas, 20 ka tawo ang nadakpan ug 32 ka armas ang nasakmit, apil ang usa ka explosive ug 92 ka bala.
Samtang sa illegal gambling, 93 ka tawo ang nadakpan ug nakumpiskar ang ₱12,686 nga pusta. Lakip sa mga ilegal nga sugal nga nadakpan mao ang sabong, baraha ug hantak.
Gipasabot sa PRO7 nga padayon nilang palig-onon ang ilang operasyon ug pakigtambayayong sa komunidad aron mapadayon ang kalinaw ug kaluwasan sa Central Visayas.
Source: PRO7 PIO
I via Renante Socia Lada