Gipasidunggan ni Gob. Pamela Baricuatro ang mga sanitation inspectors isip importante nga frontliners sa pagpanalipod sa panglawas sa katawhan atol sa pagbukas sa Sanitation Inspectors National Assembly sa Sugbo niadtong Abril 28.
Sa iyang mensahe, gipasalamatan sa gobernador ang mga sanitation inspectors ug public health workers gikan sa nagkalain-laing lugar sa nasud tungod sa ilang importante apan kasagaran dili makita nga trabaho sa pagmentinar sa kalimpyo ug kaluwasan sa komunidad.
Matod ni Gob. Baricuatro, tungod sa ilang paningkamot, napadayon nga limpyo ang palibot, luwas ang tubig, ug napugngan ang pagkatag sa mga sakit sa komunidad.
Gipasiugda usab niya ang dakong papel sa mga sanitation inspectors atol sa mga kalamidad nga miigo sa Sugbo niaging tuig. Miingon siya nga sa panahon sa kalamidad, mas motaas ang risgo sa sakit tungod sa hugaw nga tubig ug dili maayong sanitation.
Gihisgutan usab niya ang tema sa maong asembliya nga nagtutok sa sanitation standards ug public health ilawom sa Universal Health Care. Giingon niya nga ang probinsya sa Sugbo padayon nga nagpalig-on sa healthcare system dili lang sa pagtubag sa sakit, kundili labi na sa pagpugong niini.
Sumala pa niya, nagpadayon ang probinsya sa pag-invest sa mga ospital, health workers, ug public health programs, ug giila nga ang proteksyon sa panglawas magsugod sa komunidad pinaagi sa kalimpyo ug preventive measures.
Gidawat usab sa gobernador ang mga delegado gikan sa lain-laing probinsya ug naglaum nga ang maong asembliya mahimong oportunidad sa pagkat-on, panagtambayayong, ug pagpakita sa maabiabihong kultura sa mga Sugboanon.
Source: Cebu Province PIO
I via Renante Socia Lada