Aron mapalambo ang health infrastructure sa Cebu Province, ang Provincial Health Consultant nga si Dr. Nikki Catalan nangulo sa usa ka Capitol team sa ikaduhang benchmarking visit sa Governor Celestino Gallares Multi-Specialty Medical Center sa Bohol, usa sa pinaka-modernong tertiary hospital sa nasud.
Kini nga pagbisita gisunod sa unang tour sa team niadtong Septiyembre ug gitutokan karon ang teknikal ug estratehikong aspeto sa ospital aron makakuha og mga ideya nga magamit sa mga umaabot nga proyekto ug upgrade sa 16 ka Capitol-run nga ospital sa Cebu.
Apil sa delegasyon ang mga miyembro sa Provincial Engineering Office nga gipangulohan ni Engr. Hector Jamora, kauban sila Engr. Eva Z. Estoconing, Engr. Francis G. Wenceslao, ug Arch. Mitchel Von M. Cansico, samtang kauban usab sila Atty. Kevin Dinsay, Dr. Miguel Tristan B. Rebalde, ug Marielle Shayne P. Camacho.
Gisusi sa grupo ang disenyo sa ospital, sistema sa pagdagan sa pasyente, pagsunod sa regulasyon, engineering infrastructure, ug operational integration. Matud ni Dr. Catalan, ang tumong mao nga ang umaabot nga health facilities sa Cebu dili lang moderno ug musunod sa balaod, apan usab epektibo sa pag-alagad sa mga pasyente ug medical frontliners.
Source: Cebu Province PIO
I via Renante Socia Lada