Nagsugod ang Cebu Provincial Government og boarding ug alighting field survey niadtong Pebrero 26 ug 27, 2026 aron mapalambo pa ang sistema sa pampublikong transportasyon sa probinsya.
Ang survey gihimo sa Planning and Development Office (PPDO) pinaagi sa Local Public Transport Route Plan (LPTRP) team. Nagkuha sila og datos sama sa gidaghanon sa pasahero, oras sa pinakadaghang mosakay, mga lugar nga sakayan ug hunongan, ug unsang mga rota ang pirmi gamiton sa mga biyahero.
Gibuhat kini isip kabahin sa LPTRP o Local Public Transport Route Plan—usa ka plano sa pagpalambo sa transportasyon sa probinsya. Nakig-coordinate ang probinsya sa Land Transportation Franchising and Regulatory Board (LTFRB), Department of Transportation (DOTr), mga lokal nga gobyerno, ug mga transport operators aron masiguro ang husto ug kompleto nga datos.
Tumong sa survey nga mapaayo ang kahapsay sa mga rota, mas episyente ang serbisyo, ug masiguro ang mas luwas ug mas komportable nga biyahe para sa mga pasahero sa Sugbo.
Kabahin kini sa mas dagkong sunod-sunod nga transport studies nga ipahigayon karong tuiga, lakip na ang pag-ihap sa mga sakyanan ug pasahero, pagmonitor sa dispatch ug arrival sa mga terminal, ug pag-interview sa mga drayber, operator, ug pasahero.
Giinspeksyon usab sa LPTRP team ang rota padulong sa Bato Port agi sa Oslob ug Barili, ingon man pipila ka inter-municipal routes sa habagatang Sugbo.
Sumala sa Kapitolyo, plano nilang masurvey ang kapin 300 ka mga rota sa tibuok probinsya.
Ang kalihokan nagpakita sa lig-on nga baruganan ni Gob. Pamela S. Baricuatro nga gamiton ang tukmang datos sa pagplano aron mahimong mas moderno ug mas andam ang public transport system sa probinsya sa Cebu.
Source: Cebu Province PIO
I via Renante Socia Lada