Gipasalig sa Cebu Police Provincial Office (CPPO) nga ang makita sa nag-viral nga video bahin sa pagkahulog sa mga bato daplin sa national highway sa lungsod sa Sogod, Cebu, kabahin sa kontroladong operasyon sa Department of Public Works and Highways (DPWH). Kini gihimo aron matangtang ang mga delikadong bato nga posibleng mahugno ug makadaot sa mga motorista ug residente.
Matod sa mga awtoridad, ang operasyon usa ka kasagarang pamaagi sa engineering diin tangtangon ang huyang nga mga batong anapog sa pangpang. Atol sa operasyon, temporaryong sirad-an ang bahin sa dalan pinaagi sa mga pisi, adunay mga warning sign, ug adunay mga traffic personnel nga nagdumala sa dagan sa sakyanan aron masiguro ang kaluwasan sa tanan.
Gihangyo usab sa CPPO ang publiko nga magpabiling kalmado, mosunod sa mga panudlo sa mga traffic personnel, ug dili motuo o mopakaylap og wala mapamatud-ang impormasyon.
Padayon usab ang koordinasyon sa CPPO, DPWH, lokal nga panggamhanan, ug uban pang ahensya aron masiguro nga hapsay ug luwas ang operasyon samtang maminusan ang hasol sa mga molabay sa maong dalan.
I via Renante Socia Lada