Nakadugang og 1,364 ka healthcare workers ang Cebu Provincial Government sukad Hulyo 2025 ubos sa administrasyon ni Governor Pam Baricuatro. Kini nagdala sa kinatibuk-ang healthcare personnel sa Capitol-run hospitals ngadto sa 3,043.
Sa mga bag-ong nadugang, 199 ang mga doktor, 368 ka nurses, 181 allied health workers ug 615 ancillary ug administrative personnel. Sa kinatibuk-an, 748 ka medical professionals ang nadugang sa kasamtangang termino.
Matud sa probinsya, mitaas usab ang kapasidad sa mga ospital. Ang 16 ka Capitol-run hospitals karon adunay medical technologist nga 24 oras nga serbisyo, kumpara sa lima lamang kaniadto. Ang Cebu Provincial Hospital-Danao nagsugod usab og extended outpatient services hangtod alas-10 sa gabii.
Sa Bantayan District Hospital, nakahimo na og emergency ug laparoscopic surgeries gamit ang kaugalingong kagamitan ug mga healthcare team, nga makatabang sa mga pasyente nga dili na kinahanglan mobiya dayon sa isla alang sa pipila ka serbisyo.
Samtang nagpadayon usab ang hiring, promotion ug regularization sa mga personnel sa 16 ka ospital, lakip ang pagpangita og mga medical specialists ug surgeons. Matud sa probinsya, ang tumong mao nga ang pagdugang sa mga healthcare workers direktang mabati sa mga pasyente pinaagi sa mas paspas nga serbisyo, mas daghang medical services ug mas lig-on nga pag-atiman sa kahimsog.
I via Renante Socia Lada