Ubos sa pagpangulo ni Presidente Ferdinand R. Marcos Jr. isip ASEAN Chair alang sa 2026, gipahigayon sa Pilipinas ang espesyal nga trilateral meeting sa Cebu tali sa Prime Minister sa Cambodia nga si Hun Manet ug Prime Minister sa Thailand nga si Anutin Charnvirakul aron hisgutan ang sitwasyon sa border sa duha ka nasud.
Tumong sa maong tigom nga mapalambo ang malinawon ug konstruktibong dayalogo tali sa Cambodia ug Thailand pinaagi sa tabang sa Pilipinas isip tigpataliwala.
Atol sa panaghisgot, parehong lider mipasalig nga ipadayon ang bukas nga komunikasyon, pagpugong sa mga aksyon nga mahimong makapasamot sa tensyon, ug pagbalik sa kasamtangang bilateral nga mga mekanismo sa ilang duha ka nasud.
Gipalugwayan usab sulod sa tulo ka bulan hangtod Hulyo 2026 ang mandato sa ASEAN Observer Team o AOT. Kini nga grupo adunay mga representante gikan sa mga miyembro sa ASEAN nga motan-aw ug motaho sa pagsunod sa ceasefire agreement. Ang Pilipinas maoy nagsilbing coordinator niini.
Sa joint press conference, gipasiugda ni Pangulong Marcos nga importante ang papel sa ASEAN isip plataporma sa dayalogo, respeto sa soberanya, ug malinawon nga pagsulbad sa mga panaglalis. Si Hun Manet usab nanawagan sa hingpit nga pagpatuman sa Joint Statement nga gipirmahan niadtong
Disyembre 27, 2025, samtang si Anutin miingon nga ang panagbangi nagdala lamang og pag-antos ug misaad nga makigtambayayong sa Cambodia alang sa mas lig-on nga pagsalig ug kalinaw.
Nagkahiusa ang tulo ka lider nga ang malungtarong kalinaw makab-ot lamang pinaagi sa sinsero nga diplomasya, padayon nga panag-estorya, ug pagtuman sa internasyonal nga balaod.
Source: PCO
I via Renante Socia Lada