Ang kasayon sa usa ka hapon kagahapong adlawa, Abril 28, 2025, sa Barangay Candi-is, Badian naputol sa kalit nga pagpamusil nga misangpot sa kamatayon sa usa ka barangay konsehal ug pagkasamad sa usa ka senior citizen.
Si Guillermo Sabala Antipuesto, 42 anyos, incumbent konsehal sa maong barangay, napusilan og samtang naghulat sa usa ka waiting shed uban sa iyang silingan nga si Ambrad Santos Calunsag, 72 anyos.
Base sa report sa Badian Municipal Police Station, kalit nga miabot ang duha ka suspetsado nga nagsakay og motorsiklo ug gipamusil ang duha, diin si Antipuesto maoy naigo sa daghang mga bala samtang si Calunsag naangol sa bukton.
Gipaklaro sa mga imbestigador nga si Antipuesto giilang supporter ni municipal councilor ug mayoral candidate Gerry Duque, apan giingon nga wala pa’y klarong ebidensiya nga ang motibo sa krimen may kalambigitan sa politika.
Gidali pagdala sa ospital ang mga biktima apan gideklarar nga dead-on-arrival si Antipuesto. Sa pagkakaron, padayon ang hot pursuit operation batok sa mga responsable.
Ang kapulisan nagpabilin nga bukas sa tanang anggulo samtang padayon ang imbestigasyon aron matino ang hinungdan ug mga suspetsado sa maong pagpamusil.
I via Renante Socia Lada