Nagpahigayon og Civil Disturbance Management (CDM) Refresher Training ang Bohol Police Provincial Office (BPPO) niadtong Disyembre 12, 2025 sa Camp Francisco Dagohoy sa Tagbilaran City, isip pagpangandam sa umaabot nga ASEAN meetings nga himuon sa probinsya sa Bohol.
Tumong sa maong pagbansay ang pagpalig-on sa panaghiusa ug hapsay nga koordinasyon sa lain-laing yunit sa kapulisan sama sa maneuver platoons, municipal police stations, ug provincial mobile units, aron molihok sila isip usa ka han-ay ug lig-on nga pwersa sa panahon sa dagkong kalihokan.
Gibansay ang mga kapulisan sa sakto nga pormasyon, han-ay nga lihok, hapsay nga pag-deploy, ug klarong komunikasyon, sumala sa regional CDM guidelines. Gihimo usab ang inspeksyon sa mga gamit sama sa shields, helmets, batons, body armor, ug communication equipment aron masiguro nga andam ug parehas ang kahimtangan sa tanang kagamitan.
Matud ni Police Colonel Patricio Decay, Provincial Director sa Bohol, importante kaayo ang panaghiusa ug koordinasyon sa dagkong security operations, ilabi na nga mag-abot ang mga langyaw nga delegado ug high-profile nga bisita.
Gidayeg usab ni PBGEN Redrico A. Maranan, Regional Director sa PRO7, ang BPPO tungod sa paghatag og prayoridad sa maong pagbansay. Matud niya, ang kalampusan sa pag-host sa ASEAN nagkinahanglan dili lang kahanas ug ekipo, kondili disiplinado nga paglihok ug tin-aw nga komunikasyon. Giingon pa niya nga andam ang Central Visayas sa pagpanalipod ug pagseguro sa malinawon ug luwas nga mga kalihokan sa ASEAN.
Source: PRO7 PIO
I via Renante Socia Lada