Nagpahimangno ang Provincial Health Office (PHO) sa Bohol human makumpirmar nga nisaka na sa 882 ang total nga kaso sa HIV sa probinsya sukad pa sa tuig 1984. Kini gipamatud-an ni Dr. Fruserma Mary Uy, nga nagkanayon nga ang datos nagpakita sa padayon nga hamubo apan klarong pagtaas sa mga kaso.
Gikan sa Enero hangtod Hunyo 30, 2025, adunay 87 ka bag-ong kaso nga narekord sa Bohol, mas ubos sa unang gituohang 100 ka kaso. Gipasabot sa PHO nga kulang pa ang ilang datos gikan Hulyo hangtod Disyembre, hinungdan nga posibleng mudugang pa ang total sa pagkahuman sa tuig.
Sa kasamtangan nga datos, mga kalalakin-an gihapon ang labing daghan nga natala sa HIV infection. Ang mga mode of transmission nagpakita nga nag-una ang lalaki nga nakighilawas sa lalaki, gisundan sa lalaki nga nakighilawas sa babaye, ug lalaki nga nakighilawas sa duha lalaki ug babaye.
Makita usab nga ang edad 15 hangtod 49 anyos ang pinakalabing apektadong age group, nga nagpakita nga ang mga tawo sa produktibong edad mas duol sa risgo ug exposure. Nagpadayag kini og kabalaka alang sa public health sector sa probinsya.
Tungod sa kahimtang, nag-awhag ang PHO sa katawhan sa Bohol nga magpabilin nga alerto, magpa-test, ug mosalmot sa awareness programs aron mapugngan ang dugang pagkatap sa HIV. Ilang giklaro ang kamahinungdanon sa sayo nga paghibalo ug pagpakabana aron mapanalipdan ang kaugalingon ug ang komunidad.
Source: Bohol PHO
I via Renante Socia Lada Renante