Nakapatuman og search warrant ang Bogo City Police Station sa sayong buntag niadtong Enero 29, 2026, nga misangpot sa pagdakop sa usa ka suspek ug pagkasakmit sa usa ka walay rehistro nga pusil ug mga bala sa Purok Isyot, Barangay Dakit, Bogo City.
Ang operasyon gihimo subay sa Search Warrant tungod sa paglapas sa Republic Act 10591 o balaod batok sa ilegal nga pagpanag-iya sa armas, nga giisyu ni Judge Cesar M. Madeja sa RTC Branch 80, Bogo City.
Ang suspek, nga nailhan sa alyas nga “Ray,” 43 anyos, residente sa maong lugar, nadakpan atol sa legal nga pagpangita sa kapulisan.
Sa operasyon, nakuha sa kapulisan ang usa ka caliber .38 revolver nga may unom ka buhi nga bala, unom pa ka dugang nga bala, ug usa ka itom nga leather holster. Ang tanang nakumpiskar gimarkahan dayon sa lugar ug gidala sa Bogo City Police Station alang sa hustong dokumentasyon.
Gipahigayon ang search sa hilom ug hapsay nga paagi, atubangan sa suspek ug sa mga gikinahanglan nga testigo lakip ang barangay opisyal, mga tanod, ug usa ka representante sa media.
Gidayeg ni Cebu Police Provincial Director PCOL Abubakar Udang Mangelen Jr. ang kapulisan sa ilang pagkamatinud-anon ug pagsunod sa hustong proseso, ug miingon nga padayon pa nilang palig-onon ang kampanya batok sa ilegal nga armas aron masiguro ang kaluwasan ug seguridad sa komunidad.
Source: CPPO
I via Renante Socia Lada