Naluwas sa mga rescuer ang usa ka bata nga babaye human kini aksidenteng natagak sa pangpang sa Sitio El Grahe, Barangay Busay, Cebu City.
Mga alas-3 kagahapon sa hapon, samtang padulong sa Buwakan ni Alejandra sa Barangay Gaas, Balamban, Cebu sila si PLT Bryan G. Batiquin ug PSSg Junrey Terana, ubos sa direct supervision ni PMAJ Kelvin Roy P. Mamaradlo, OIC-TPU alang sa ilang regular nga pag-roving ug inspection, namatikdan sa mga personnel sa Tourist Police Unit-Cebu Police Provincial Office (TPU-CPPO) nga adunay rescue operation sa daplin sa dalan.
Giduol dayon sa mga pulis ang lugar ug nakig-coordinate sa Busay Barangay Disaster Risk Reduction and Management Office (BDRRMO), nga maoy nag-rescue sa bata nga babaye nga aksidenteng nakahulog sa taas nga pangpang.
Pinaagi sa paspas nga pagresponde ug maayong pagtinabangay sa TPU-CPPO ug Busay BDRRMO, malampusong naluwas ang bata ug nadala sa luwas nga lugar.
Gipakita sa insidente ang importansya sa dali nga pagresponde ug koordinasyon sa pagpanalipod sa kaluwasan sa publiko, ilabina sa mga lugar nga kasagarang adtoan sa mga turista ug motorista.
📸 TPU-CPPO
I via Renante Socia Lada