Misangko sa kahadlok ang sayong kabuntagon sa Pier 3, Sabado, Hulyo 26, human nagkabangga ang duha ka barko nga nag-operate sa lain-laing ruta, tungod sa kalit nga problema sa makina ug kusog nga bawod.
Base sa inisyal nga report, ang MV Our Lady of Good Fortune, usa ka RORO vessel gikan sa Dipolog City, nakasinati og engine trouble samtang padulong na unta kini mudunggo sa pantalan. Tungod sa kalit nga kakulian, nadala kini sa kusog nga balod ug mitumbok sa kilid sa MV Starcraft 7 nga nag-andam unta sa paglarga paingon sa Tubigon, Bohol.
Ang kalit nga pagdasmag nakahatag og dakong kahadlok sa mga pasahero ug tripulante sa duha ka barko, apan mapasalamaton sila nga walay nangaangol ni usa kanila. Gipasiguro sa mga crew ang ilang kaluwasan ug gipaubos dayon sa maayong pagdumala ang mga pasahero.
Ang MV Our Lady of Good Fortune gipanag-iya sa Medallion Transport Inc., samtang ang MV Starcraft 7 kay iya sa Seahighway Carrier Inc. Gikasang-at na ang report ngadto sa Philippine Coast Guard alang sa mas lawom nga imbestigasyon ug aron masuta ang legal nga kalabutan sa hitabo.
Samtang gi-inspeksyon ang kadaot sa mga barko, gikuhaan og pamahayag ang mga opisyal sa duha ka kompanya ug gihangyo ang publiko nga mag-amping ug magpadayon sa pagsalig sa mga awtoridad sa ilang siguridad sa dagat.
I via Renante Socia Lada