Naluwas ang upat ka mga sakay sa bangka nga nalunod didto sa kadagatan sa Bantigue, Barangay Tingo, Isla sa Olango, Sakop sa Dakbayan sa Lapu-Lapu, pasado alas 9:00 kagabii, Disyembre 23,2022.
Sa nasayran gikan ni Nagiel Bañacia, sa Lapu-Lapu City Disaster Risk Reduction Management Office (CDRRMO), nga gikan sa Isla sa Hingotanan sa probinsya sa Bohol ang upat ka mga sakay sa maong bangka diin tulo niini lalaki ug usa ang babaye.
Maghatud unta sila sa mga isda ug kinason didto sa Barangay San Vicente sa Isla sa Olango nga nakasugat og bati nga kahimtang sa panahon.
Nalunod ang maong bangka kay nabali ang katig niini tungod sa mga dagkong bawod nga ilang gikasugat.
Nanglangoy ang mga biktima paingon sa baybayon og gitabangan kini sa mga residenti nga nakakita sa maong panghitabo ug gidala sila sa tambalanan.
Mahinumduman nga nagpa gawas og gail warning advisory ang PAGASA gumikan sa kusog nga amihan nga maoy naka mugna og kusog nga mga bawod. (Renante Lada, photo courtesy by Nagiel B.Bañacia)