Wala pasudla sa mga gwardiya karong buntag Abril 15, 2024, sa Metro Cebu Water District building si Atty. John Dx Lapid, nga padulong na uta mo trabaho.
Si Atty. Lapid maoy bag-ong gitudlo isip OIC General Manager sa MCWD.
“Gikan-isip labaw sa MCWD Customer Care Division, si Lapid giinstalar sa MCWD Interim Board of Directors niadtong Biyernes, Abril 12, isip acting general manager sa sulod sa 90 ka mga adlaw human sa pagsuspenso niini kang Edgar Donoso,” segon sa Cebu City PIO.
Sa nasayran nga Donoso gipahamtangan og 90 ka mga adlaw nga preventive suspension tungod sa “continuing defiance” o nagpadayong pagsupak sa kamanduan sa Interim Board.
Matod sa Cebu City PIO nga niadtong Biyernes, nihangyo si Lapid kang Donoso ug kang Atty. Jose Daluz, III, MCWD chairman, nga tumanon lang ang mga kamanduan sa Interim Board aron walay gubot.
“Apan karong buntag, sumala pa, nisugo si Donoso nga dili pasudlon si Lapid ug nga ipatuman ang lockdown “to ensure unhampered public service and protect the well-being and safety of its employees against any form of intimidation”. dugang sa taga PIO sa Cebu City.
Apil usab nga wala pasudla ang mga sakop sa Interim Board.
Segon ni Lapid nga sa pagkakaron iyang tumanon ang mando sa LWUA nga “hold the line”.
Atol sa pagtudlo ni Atty. Lapid niadtong adlaw na Biyernes naghangyo usab ang Interim Board ngadto sa kapulisan sa Cebu City Police Office nga mobantay aron dili makasulod pa sa MCWD si Donoso ug si Daluz.
“Apan karong buntag, sa pakighinabi sa News & Information, niingon si Lapid nga nibalibad ang kapulisan tungod sa kay ang kahimtang aduna pay lalis sa balaud nga korte ray makaresolbar,” pamahayag sa Cebu City PIO. (Renante Lada)
(Source: Cebu City PIO)
