Patay diha-diha ang usa ka babaye nga nagmotor human kini malatayan sa usa ka prime mover trailer truck sa National Highway, Barangay Magdugo, syudad sa Toledo, alas 8:45 sa buntag niadtong Enero 7, 2026.
Giila sa kapulisan sa Toledo City Police Station ang biktima nga si Queenie Chelle Laruap, hingkod ug residente sa Barangay Don Andres Soriano sa maong syudad. Samtang ang drayber sa trak giila lang sa alyas nga Leo, 43 anyos, residente sa Barangay Matab-ang, Toledo City.
Base sa imbestigasyon sa Toledo City Police Station, parehas nga padulong sa usa ka direksyon ang trak ug ang motorsiklo, diin nag-una ang trailer truck ug gasunod ang motorsiklo sa biktima.
Pag-abot sa lugar sa insidente, giingong misulay og overtake si Laruap sa tuo nga bahin sa trak. Apan natumba nga nakaagi kini sa lapukon ug lunang nga bahin sa dalan hinungdan nga nawad-an siya og kontrol sa manubela.
Tungod niini, nabangga ang motorsiklo ug napasok ilawom sa trak nga miresulta nga nalatayan ang biktima. Gidala pa siya dayon sa Toledo City Hospital apan gideklarar nga patay na pag-abot didto.
Sa pagkakaron, gikustodiya na sa Toledo Police ang drayber sa trailer truck ug posibleng mag-atubang og kasong Reckless Imprudence Resulting to Death, samtang padayon pa ang lawom nga imbestigasyon sa nahitabo.
I via Renante Socia Lada