Gidakop ang usa ka babaye sa Barangay Yati, Liloan human siya nasangkot sa kaso nga paglapas sa Anti-Rabies Act of 2007 (RA 9482), tungod kay wala niya bayari ang gasto sa tambal sa tawo nga napaakan sa iyang binuhing iro.
Giila ang suspek nga si Annabella Villarejo Jubay, 42 anyos, residente sa Cañete Compound, Purok Duranta, Sitio Cogon sa maong barangay. Gidakop siya sa mga sakop sa Liloan Municipal Police Station pasado alas 11:00 sa buntag niadtong Lunes, Mayo 26, 2025.
Base sa impormasyon, si Jubay, lumad nga taga Dimataling, Zamboanga del Sur, giisyu-an og Warrant of Arrest ni Hon. Judge Maria Dee Seares sa RTC Branch 6 sa Mandaue City (Family Court). Ang warrant may kalabutan sa iyang paglapas sa Section 11, Article 4 sa Anti-Rabies Law, nga nagmando nga ang tag-iya sa iro obligadong motubag sa tambal sa tao nga napaakan sa ilang binuhing hayop.
Nasayran nga ang biktima nga napaakan sa iro ni Jubay nidangop na sa ilang barangay apan wala kini maremedyohan, hinungdan nga gipasaka ang kaso ngadto sa korte.
Gidakop si Jubay sa tracker team sa kapulisan ug kasamtangang nag-atubang sa legal nga proseso. Apan, tugotan siyang makagawas sa prisohan kung makaplastar og piyansa nga P6,000.
I via Renante Socia Lada