Gitapos sa kalampusan ang tibuok semana nga operasyon sa OPLAN BULABOG ug OPLAN BAKAL-SITA sa dakbayan sa Sugbo human madakpan ang tulo ka suspek sa ilegal nga drogas ug 277 ka minor de edad nga naluwas nga nakalapas sa curfew ordinance.
Gipahigayon ang operasyon gikan sa gabii sa Mayo 19 hangtod sa kaadlawon sa Mayo 25, 2025, uban ang partisipasyon sa kapin gatusan ka personnel gikan sa Cebu City Police Office (CCPO), mga lokal nga kagamhanan, ug uban pang force multipliers.
Pinangulohan ni PCOL Enrico E. Figueroa, Acting City Director sa CCPO, ug PBGEN Redrico A. Maranan, Regional Director sa PRO-7, gituyok ang tanang 80 ka barangay sa dakbayan, uban ang tumong nga mapalig-on ang seguridad ug mapatuman ang mga lokal nga balaod.
Sa nasayran, 3,153 ka establisyemento ang na-inspeksyon, 1,145 ka indibidwal ang napangutana, 277 ka minor de edad ang naluwas sa curfew violations. 2 ka indibidwal ang gitiketan tungod sa pagpanigarilyo ug pag-ihi sa pampublikong lugar. Tulo usab ka suspek sa ilegal nga drogas ang nadakpan.
Mga nadakpan sa drug operation:
- Alias Atan, 35 anyos, taga Riverside, Barangay Lawaan 3, Talisay City
- Duha ka lalaki, 40 ug 42 anyos, mga residente sa Barangay Ermita, Cebu City
Nasakmit sa mga suspek ang 5.12 gramos nga gidiling drogas nga gibanabana ug kantidad nga ₱34,816.
Matud ni PBGEN Maranan, ang padayon nga presensya sa kapulisan ilabi na sa mga lugar nga sagad ang krimen, importante aron mabati sa katawhan ang kaluwasan ug proteksyon.
Gi-awhag usab ang panaghiusa sa tanang ahensya aron epektibo ang pagpugong sa kriminalidad.
Ang CCPO ug ang PRO-7 magpadayon sa pagpasiugda og mga inisyatiba nga mosiguro sa kaluwasan sa komunidad.
Source: CCPO
I via Renante Socia Lada