Upat ka mga indibidwal, lakip ang usa ka Australian national, ang nadakpan sa duha ka anti-drug operations nga gipahigayon sa National Bureau of Investigation-Central Visayas (NBI-7) ning buwana.
Unang Operasyon: Drug Den sa Duljo-Fatima niadtong Marso 14, 2025, sa Barangay Duljo-Fatima, Cebu City.
Nasikop sa unang operasyon ang tulo ka indibidwal nga giilang sila si:Johannes Cabarrubias, Rhey Lalaine Basera (mabdos), ug Andrew Estano.
Matud sa NBI, ang mga suspek nagpadagan og drug den, nga ilang giabangan isip suyopanan sa ginadiling drogas. Nasakmit gikan kanila ang mga ginadiling drugas ug kagamitan sa pagsuyop.
Ang mga nadakpan gipasakaan og kaso subay sa Sections 5, 11, ug 15 sa Comprehensive Dangerous Drugs Act.
Ikaduhang Operasyon: Nasikop ang Langyaw, niadtong Marso 18, 2025, sa Barangay Basak-San Nicolas, Cebu City.
Sa laing operasyon, nadakpan ang 54-anyos nga Australian national nga si Tony Ristanovski. Mga ginadiling drugas ug kagamitan sa pagsuyop ang nasakmit gikan kaniya.
Si Ristanovski gipasakaan og kaso alang sa paghupot ug paggamit sa ginadiling drogas.
Ang tanang nadakpan kasamtangang natanggong sa NBI detention cell, samtang nagpadayon ang imbestigasyon ug kaso batok kanila.
Padayon ang kampanya sa NBI batok sa ilegal nga drogas aron maseguro ang kahapsay ug seguridad sa rehiyon. (Renante Socia Lada)
(Source: NBI-7)