Patay ang usa ka 31-anyos nga lalaki human kini pusila samtang nagpalit og pagkaon sa Sitio Cogon, Barangay Poblacion, Liloan, Cebu, alas 3:10 sa kaadlawon, Sabado, Marso 22, 2025.
Ang biktima giila sa kapulisan nga si Jomar Mantuhac Andrino, residente sa Purok Cogon, Barangay San Vicente, Liloan. Base sa imbestigasyon, nagpalit kini og pagkaon ug naghulat og sakyanan pabalik sa ilang balay dihang kalit nga miabot ang wala pa mailhing suspek nga nagsakay og motorsiklo.
Gipusil makausa ang biktima, nga naigo sa ubos sa iyang ilok. Tungod sa grabeng kadaot, diha-diha siya namatay sa crime scene, samtang ang suspek dali nga misibat padulong sa Sitio Sambag, San Vicente.
Matod sa kapuyo ni Andrino, nakadawat na kini og mga pagpanghulga nga may kalabotan sa ilegal nga drugas. Duha ka adlaw sa wala pa ang krimen, usa ka lalaki ang mipadalag direktang hulga batok sa biktima. Kini karon ang ginasubay sa kapulisan isip person of interest sa kaso.
Sa pagkakaron, padayon pa ang imbestigasyon sa kapulisan sa Liloan aron matino ang tinuod nga motibo sa krimen ug matumbok ang responsable sa pagpamusil. (Renante Socia Lada)