Nasikop sa kapulisan sa Consolacion Municipal Police Station ang usa ka 42 anyos nga lalaki atol sa pagpatuman og search warrant sa Barangay Cabangahan, Consolacion, Cebu niadtong nakalabay nga adlaw.
Sumala sa kapulisan, ang suspetsado gidakop tungod sa paglapas sa Republic Act No. 10591 o ang Comprehensive Firearms and Ammunition Regulation Act. Ang maong lalaki minyo ug lumulupyo sa Consolacion.
Atol sa operasyon, narekober gikan sa suspetsado ang usa ka kalibre .22 nga revolver nga walay serial number ug marka, adunay sulod nga tulo ka buhing bala sa samang kalibre.
Matud sa mga otoridad, kabahin kini sa gipakusog nga kampanya sa Cebu Police Provincial Office batok sa mga ilegal nga armas ug uban pang kriminal nga kalihokan nga makahatag og hulga sa kaluwasan sa publiko.
Gipasidunggan ni PCOL Abubakar Udang Mangelen Jr. ang mga operatiba sa ilang malampusong pagpatuman sa search warrant. Iyang gipasiugda nga padayon ang Cebu PPO sa pakigbatok sa pagdaghan sa mga loose firearms aron masiguro ang kalinaw, kahapsay, ug kaluwasan sa mga komunidad sa tibuok lalawigan sa Cebu.
I via Renante Socia Lada