Padayon ang kampanya sa Cebu Police Provincial Office (CPPO) ubos sa Safer Cities Initiative, diin 400 ka suspek ang nadakpan atol sa 231 ka police operations nga gihimo sa tibuok lalawigan sa Sugbo sa Hunyo 30, 2026.
Base sa report sa kapulisan, 277 ang nadakpan tungod sa paglapas sa city o municipal traffic ordinances. Aduna usab 71 ka kaso sa pag-inom og ilimnong makahubog sa pampublikong lugar, 23 ka kaso sa panigarilyo sa publiko, 12 ka menor de edad nga nakalapas sa curfew, 12 ka tawo nga nagsuroy nga walay sanina sa taas nga lawas, usa ka kaso sa karaoke nga milapas sa gitugot nga oras, ug upat pa ka uban nga paglapas sa lokal nga ordinansa. Walay natalang kaso sa vandalism, pagsul-ob og balaclava, ug ilegal nga road obstruction.
Sa kinatibuk-an, 277 ka violators ang gipamulta samtang 123 ang gipasidan-an ug gipagawas sumala sa balaod. Ang operasyon nakatigom usab og ₱105,650 gikan sa mga multa.
Matud ni Cebu PPO Provincial Director PCOL Abubakar Udang Mangelen Jr., ang patas apan hugot nga pagpatuman sa mga lokal nga ordinansa dako og tabang sa pagpugong sa krimen ug pagmintinar sa kalinaw ug kahapsay sa komunidad. Giawhag usab niya ang tanang Sugboanon nga magpadayon sa pagsunod sa balaod ug pagtinabangay sa kapulisan.
Gidayeg usab ni PRO-7 Regional Director PBGen Arnold Evangelista Abad ug Cebu Governor Pamela Baricuatro ang panaghiusa sa kapulisan, lokal nga panggamhanan, ug mga residente sa pagpalig-on sa kalinaw ug kaluwasan sa tibuok lalawigan sa Sugbo. Matud nila, magpadayon ang CPPO sa pagpalig-on sa police visibility ug pagpatuman sa mga ordinansa aron masiguro ang luwas ug malinawon nga komunidad.
I via Renante Socia Lada