Usa ka babaye ang namatay sa trahedya human malatayan sa usa ka 10-wheeler truck samtang nag-angkas sa motorsiklo nga na-disgrasya sa National Highway, Barangay Media Once, Toledo City, pasado alas 11:00 sa buntag niadtong Hunyo 25, 2025.
Giila ang biktima nga si Mitchelle Padwelan Paragoso, 41-anyos, residente sa Toledo. Siya ang angkas sa motorsiklo nga gimaneho sa iyang live-in partner nga si Oliver Canlobo, 50-anyos.
Sumala sa imbestigasyon sa kapulisan, gikan sa Barangay Sangi ang duha ug paingon sa Barangay Poog, dihang nawad-an og kontrol si Canlobo sa ilang motorsiklo pag-abot sa Barangay Media Once. Sa kasubo, nalagpot si Paragoso ug nalatayan sa 10-wheeler truck nga gimaneho ni Edelito Oxillar Planco Jr., 35-anyos, taga Barangay Magdugo.
Dali nga gidala si Paragoso sa tambalanan, apan gideklarar kini nga dead on arrival tungod sa grabeng samad sa lawas nga nadawat niya sa aksidente.
Padayon ang imbestigasyon sa kapulisan aron masuta ang tibuok detalye sa insidente ug matino kung aduna bay kalapasan sa trapiko nga nahimo sa mga nalambigit sa maong trahedya.
I via Renante Socia Lada