Usa ka American national ang napalgan nga wala nay kinabuhi ug paingon na sa pagkadugta didto sa Amalfi, Citi Di Mare, SRP, Mambaling, Siyudad sa Sugbo.
Pasado alas 4:41 sa hapon, December 16, 2024. Ang biktima giila sa kapulisan na mao si Thomas Melvin Owens, 60 anyos, usa ka kanhi Physical Therapist ug taga California, USA.
Matod sa mga sakop sa Scene of the Crime Operatives (SOCO-7) nga dali silang niproseso sa crime scene human kini ipahibalo sa mga gwardiya sa maong lugar.
Nasuta sa imbestigasyon sa kapulisan nga si Owens katapusang nakit-an niadtong Sabado, December 14, 2024, ug wala na kini mogawas sa iyang lawak sukad pa niadto. Ang mga gwardiya maoy unang nakabantay sa dili maayong baho nga naga gikan sa lawak sa biktima.
Sa ilang pagsusi, nasuta nga ang biktima nagbuy-od na wala nay kinabuhi ug nagsugod na sa pagkadugta. Sa pagkakaron padayon ang imbestigasyon sa kapulisan aron mahibaw-an ang hinungdan sa kamatayon sa biktima. (Renante Socia Lada)