Nadakpan sa mga operatiba sa Criminal Investigation and Detection Group (CIDG)-Cebu Team ang pinangita nga si Jonathan Comaling, residente sa Barangay Jampang, lungsod sa Argao, Cebu, pasado alas 4:00 sa buntag, Disyembre 17, 2024.
Sumala sa report, ang pagkasikop nahitabo sa dakbayan sa Sugbo diin si Comaling nakuhaan og duha ka tag-as nga armas nga adunay mga magazine sa bala ug duha ka pistola.
Sa usa ka FB post ni Police Major Janus Giangan, Hepe sa Kapulisan sa Argao, gikumpirma nga si Comaling adunay warrant of arrest gumikan sa kalambigitan niini sa mga illegal nga aktibidad nga nahitabo sa lungsod sa Argao.
Padayon usab nga gipangita sa kapulisan ang igsuon ni Comaling nga posible usab adunay kalambigitan sa mga iligal nga kalihokan.
Nasayran nga ang dinakpan giila nga pangulo sa gun for hire nga naglihok sa Sugbo.
Gipasalamatan sa kapulisan ang kooperasyon sa katawhan ug padayon nga nanawagan nga magreport sa mga otoridad kung adunay impormasyon mahitungod sa mga suspek o ilegal nga aktibidad sa ilang mga lugar. (Renante Socia Lada)