Segon sa Naga City Police Station nga nitaliwan na ang 26-anyos nga si Deidre Delute, ang amahan sa 6-anyos nga namatay human gidasmagan ang ilang motorsiklo kadlawon sa Pasko.
Sumala ni PSsg Gilbert Ybañez, imbestigador sa Naga City PNP, ang kamatayon ni Delute gipahibawo sa tambalan diin siya gi-admit. Samtang, ang iyang asawa nga si Jennifer Lines Julia padayon pang gi-obserbahan tungod sa grabeng mga samad nga iyang naangkon.
Mahinomduman nga ang 6-anyos nilang anak nga si Caroline Delute namatay diha-diha human sa aksidente diin nabangga ang ilang motor sa usa ka Ford Explorer nga gimaneho ni Wise Knight Sejaldo, 21 anyos, taga Lungsod sa Sibonga, Sugbo.
Sa maong aksidenti nigawas sa imbestigasyon nga posibling hubog ug nakatulog ang drayber sa SUV na maoy hinungdan nga nikawat kini sa pikas linya diin nagbiyahi ang mga biktima.
Matud ni Ybañez, pasakaan og dugang kaso karong adlawa si Sejaldo, lakip na ang Reckless Imprudence resulting to Double Homicide, Serious Physical Injury, ug Damage to Property. (Renante Socia Lada)