Anaa sa talandugon ang kahimtang sa usa ka amahan human giunay sa pagtigbas sa iyang kaugalingon nga anak.
Ang krimin nahitabo pasado alas 10:00 kagahapon sa buntag, Hulyo 9, 2022, didto sa Sitio Kulti, Barangay Obong, lungsod sa Dalaguete, probinsya sa Sugbo.
Ang biktima giila sa Dalaguete Police Station nga mao si Jose Amacna Hontiveros, 70 anyos ang panuigon, mag uuma, ug residenti rapud sa maong lugar.
Naila usab ang suspetsado nga mao si Jennifer Hontiveros, 36 anyos ang pangidaron, nagpuyo rapud sa maong dapit.
Sa inbestigasyon sa Dalaguete Police Station nasayran nga nihangyo ang amahan sa iyang anak nga pakuyugon mag harvest sa mga sibuyas apan nasuko kini og nikuha og sundan na maoy iyang gigamit sa pagtigbas.
Nakaangkon og mga samad sa nawong ug kalawasan ang biktima nga anaa sa talandugon ang kahimtang.
Daling nihimo og manhunt operation ang kapulisan og ilang nasikop ang suspetsado nga anak.
Nasayran usab nga kanhi na rehab ang anak gumikan sa subrang paggamit niini sa ginadiling drugas nga atol sa maong panghitabo wala kini kainom sa iyang tambal.
Kasong frustrated homicide ang giandam karon sa kapulisan batok sa anak nga niunay pagtigbas sa iyang amahan. (Renante Lada, photo courtesy of Dalaguete PS)