Segon sa Cebu City PIO nga gikatakda nga mohurar atubangan ni Department of Interior and Local Government (DILG)-7 Director Leocadio T. Trovela si Mayor Raymond Alvin Garcia aron motiwas sa nahibiling mga buwan sa termino ni Mayor Mike Rama.
Wala hinuon magsulti si Mayor Garcia kanus-a kini mahitabo, basta ang ingon niya inigkahuman na kini sa pagduso sa ilang mga sertipiko de kandidatura o certificate of candidacy (COC) karong adlawa Oktubre 8, 2024.
Sa iyang press conference kagahapon sa buntag, Oktubre 7, 2024 gipanghinaot ni Mayor Garcia nga unta maaayo og resulta ang legal nga lihok ni Mayor Rama isip tubag sa mando sa Ombudsman nga nagtangtang kaniya sa serbisyo ug nag-disqualify nga mogunit bisan unsang pampubliko nga katungdanan.
“I wish him well regarding the process that he has to undertake. Of course, I know it must be a very difficult situation for him. If it happens to me I would also feel the same way. If it happens to anyone for that matter, they would also feel the same way. But ako, I wish him well in the legal process,” ingon ni Mayor Garcia.
Gitin-aw niya nga walay mahitabong kausaban sa iyang mga “priority projects and programs” nga iyang gipatuman sukad siya nilingkod isip acting mayor Mayo 10 niining tuiga. Pipila sa maong mga proyekto ug programa mao ang kabahin sa panglawas ingon man sa Gubat sa Baha.
“In fact, I’ve been meeting with the department heads; nothing has changed so far. Everything remains the same. My priority on health is the same, on the gubat sa baha remains the same, on solving the many issues here hounding the city, it remains the same”. (Renante Lada and Ting Joe Pepito)
(Source: Cebu City PIO)